Qəzza zolağında fəaliyyət göstərən yeganə xəstəxana olan Əl-Əqsa Şəhidləri Xəstəxanasının rəhbərliyi generatorlardan birinin nasaz olduğunu və bunun onlarla xəstənin və vaxtından əvvəl doğulan körpənin ölümünə səbəb ola biləcək “fəlakət”ə gətirib çıxaracağını açıqlayıb.

Aztibb.az bu barədə medimagazin.com.tr-yə istinadla xəbər verir.

Xəstəxana rəhbərliyinin verdiyi yazılı açıqlamada generatorlardan birinin texniki nasazlıq səbəbindən işləmədiyi qeyd edilib.

Həmçinin bu vəziyyətin reanimasiya otaqlarında və elektriklə işləyən respiratorlarda onlarla yaralı, xəstə və vaxtından əvvəl doğulmuş körpənin ölümü ilə nəticələnə biləcək humanitar fəlakətin xəbərçisi olduğu bildirilib.

Açıqlamada hazırda xəstəxanada 700-dən çox yaralı və xəstənin müalicəsinin davam etdiyi, Qəzzanın mərkəzi qubernatorluğunda bir milyondan çox insana və köçkünə xidmət göstərildiyi, İsrailin Qəzzaya elektrik enerjisi vermədiyi və xəstəxananın 244 gündür fasiləsiz olaraq yalnız iki generatorla işlədiyi qeyd olunub.