Böyük Britaniyada müalicə olunan minlərlə xərçəng xəstəsinin fərdiləşdirilmiş peyvəndlərlə yeni müalicə növünün sınaqlarına başlanılması gözlənilir.

Aztibb.az-ın medimagazin.com.tr-yə istinadla məlumatına görə, Milli Səhiyyə Xidmətinə daxil olan 30 xəstəxana xərçəng peyvəndi layihəsinə imza atıb.

Bu sistem xərçəng xəstələrini mRNA texnologiyasından istifadə edərək sınaqlarla uyğunlaşdırır.

mRNA texnologiyası mövcud COVID vaksinlərində də istifadə olunur.

55 yaşlı Elliot Pfebve İngiltərədə bağırsaq xərçənginə qarşı fərdiləşdirilmiş peyvəndlə müalicə olunan ilk xəstədir.

Daha əvvəl cərrahiyyə əməliyyatı və kimya terapiyası keçirən Elliot Birmingemdəki Kraliça Elizabeth xəstəxanasında peyvənd olunub.

Həyəcanlı olduğunu bildirən Elliot peyvənd haqqında "Uğurlu olarsa, bu, tibbi bir sıçrayış olacaq. Minlərlə insana kömək edə və ümid verə bilər" dedi.