Bu barədə Aztibb.az-a TƏBİB-dən məlumat verilib.

 

Bununla əlaqədar keçirilən görüşdə TƏBİB-in İcraçı direktorunun müavinləri Araz Nəsirov, Anar İsrafilov, TƏBİB-in Təlim və tədqiqatlar departamentinin rəhbəri Teymur Mirzəbəyli, ictimai birliklərin sədrləri və digər əməkdaşlar iştirak edib.

 

Görüşdə qarşılıqlı əməkdaşlıq əlaqələrinin ölkədə davamlı tibbi təhsilin inkişafı, tibb işçilərinin potensialının gücləndirilməsi, onların peşəkar inkişafı üçün mexanizmlərin yaradılması, nəzəri bilik və praktiki bacarıqlarının təkmilləşdirilməsi məqsədilə tibbi elmi-praktik konfrans, təlim, ixtisasartırma kurslarının təşkili və mütəxəssis heyətin mübadiləsinə zəmin yaratdığı bildirilib.

 

Tibbi cəmiyyətlərin sədrləri təşəbbüs üçün təşəkkür edərək, uğurlu işlərə imza atmaq üçün əməkdaşlığın vacibliyini vurğulayıblar. Qeyd edilib ki, memorandumlar tərəflər arasında faydalı, uzunmüddətli, effektiv əlaqələrin qurulması və inkişafı üçün əməkdaşlıq çərçivəsini, koordinasiya prosedurlarını müəyyən edir.

 

Görüşdə gələcək planlar, qarşılıqlı maraq doğuran layihələrin hazırlanması, görülən işlərdə qarşıya çıxan problemlər də müzakirə olunub.