Konqresin məqsədi ürək-damar cərrahiyyəsi sahəsində dünyanın tanınmış mütəxəssisləri ilə təcrübə mübadiləsi aparmaq, tətbiq olunan yenilikləri və texnologiyaları müzakirə etməkdir.

 

Tədbirin proqramına uyğun olaraq, Avropa Ürək və Damar Cərrahiyyəsi Cəmiyyəti ilə dünyanın nüfuzlu beynəlxalq təşkilatları arasında ortaq iclaslar keçirilib.

İclaslardan birinin Azərbaycan Ürək və Damar Cərrahiyyəsi Cəmiyyəti (AÜDCC) ilə birgə təşkil olunması ölkəmizdə bu sahədə əldə olunmuş təcrübənin əcnəbi mütəxəssislərlə bölüşülməsinə imkan verib.

 

Toplantıda AÜDCC-nin fəxri sədri, professor Kamran Musayev “Torakoabdominal aorta anevrizmalarının açıq təmiri: Bakı təcrübəsi”, AÜDCC-nin üzvü Vüsal Hacıyev isə “Post ürək cərrahiyyəsində ECMO-nun səmərəli istifadəsi: vaxt və qiymətləndirmə proseslərinin optimallaşdırılması” mövzusunda məruzələrlə çıxış ediblər. Tədbir Avropa Ürək və Damar Cərrahiyyəsi Cəmiyyətinin üzvü olan mütəxəssislərin mövzu ilə əlaqədar çıxışlarından sonra, maraqlı müzakirələrlə yadda qalıb.

 

Bundan başqa, ölkəmizin müxtəlif klinikalarında çalışan ürək-damar cərrahları əldə etdikləri nəticələri tezislər və posterlər şəklində konqresdə təqdim ediblər.