İsmayıllı Rayon Mərkəzi Xəstəxanasının Təcili təxirəsalınmaz tibbi yardım şöbəsinin müdiri Tural Mövlayev Aztibb.az-a ilan sancması zamanı ilk tibbi yardımla bağlı məlumat verib.

 

Həkim bildirib ki, bütün ilan sancmaları təcili tibbi yardım tələb edir. İlan sancmasından sonra həmin nahiyədə yandırıcı ağrı, şişkinlik, tədricən göy rəngə çevrilən qızartı yaranır. Zəhər qana keçdiyi təqdirdə qusma, baş ağrısı, ishal, yüksək bədən hərarəti, ürək döyüntülərinin artması və s. müşahidə edilir. Ağır hallarda mədə-bağırsaq qanaxması, iflic baş verə bilər.

 

"İlan sancması zamanı ilkin tibbi yardım üsullarını bilmək vacibdir", - deyə qeyd edən Tural Mövlayev vurğulayıb ki, ilan sancdıqdan ilk 5 dəqiqədən sonra zəhər qana və limfa sisteminə keçir. Təcili olaraq zərərçəkənin tam sakitliyi təmin edilir. Zərərçəkən heç bir halda hərəkət etməməlidir. İlan sancan yerə aseptik və ya təmiz sarğı qoyulmalı, təcili yardım maşınına qədər onu xərəkdə aparmaq, zədələnmiş ətrafı hərəkətsiz saxlamaq lazımdır. Sınıqlarda olduğu kimi, ətrafa şin qoyulur və ya zədələnmiş ətrafın sağlam ətrafa bağlanması zəhərin orqanizmə yayılma sürətini azaldır.

 

Onun sözlərinə görə, ilan çalana ilıq şəkildə çoxlu maye, kəmşirin çay, bulyon və s. içirilməlidir. Antihistamin və ağrıkəsici preparatlar da qəbul etmək olar. Həmin tədbirlər görüləndən sonra ilan sancan şəxs təcili xəstəxanaya çatdırılmalı və ona ilan zəhəri əleyhinə xüsusi zərdab vurulmalıdır.

 

"İlan sancması zamanı heç bir halda jqut qoymaq, yaranın özünə müdaxilə etmək və zəhəri sormaq , yaranı yandırmaq, həmin nahiyədə dərini kəsmək, zərərçəkənə alkoqollu içkilər vermək olmaz", - deyə şöbə müdiri bildirib.