Cəmiyyətin diqqətini dağınıq skleroz xəstəliyi və onun fəsadlarına yönəltmək məqsədilə hər il mayın 30-u Beynəlxalq Dağınıq Skleroz Günü kimi qeyd edilir.

 

Respublika Klinik Xəstəxanasının Nevrologiya şöbəsinin müdiri, həkim-nevroloq Aytən Hüseynova Aztibb.az-a bildirib ki, dağınıq skleroz xəstəliyi mərkəzi sinir sistemini zədələyən və özünü kəskinləşmələrlə büruzə verən xəstəlikdir.

 

Onun sözlərinə görə ki, immun sistemimiz həmin hüceyrələrimizi tanıyır, lakin hansısa naməlum səbəblərdən tarazlıq pozulduqda immun sistemi hüceyrələrimizə hücuma keçir və ilk növbədə, sinir hüceyrələrinə zərər vurur:

“Sinir hüceyrələri mielin qişa ilə bürünüb və hücum nəticəsində də məhz bu qişa zədələnir. Zədələnmə nəticəsində yeriş, müvazinət və görmə pozulmaları yaranır ki, bunlar da xəstəliyin kəskinləşmələri hesab olunur. Zamanla mielin qişa bərpa olunur və xəstələr yenidən keçmiş həyatına geri dönürlər. Xəstəliyin gedişinə görə kəskinləşmələr ildə bir neçə dəfə ola bilir. Aparılan müalicələr, erkən diaqnostika nəticəsində kəskinləşmələrin sayını azaltmaq, həmçinin simptomları yüngülləşdirmək mümkündür”.

 

Aytən Hüseynova qeyd edib ki, xəstəlik əsasən 20-40 yaş aralığındakı şəxslərdə daha çox müşahidə edilir. Kiçik yaşlı və ya əksinə daha yaşlı pasientlərdə də dağınıq skleroz xəstəliyinə rast gəlinir. Xəstəlik qadınlar arasında daha çox müşahidə edilir. Dağınıq skeleroz özünü görmənin zəifləməsi, ikiligörmə, əllərdə və ayaqlarda keyləşmə, gizilti, başgicəllənmə formasında büruzə verir. Sonrakı mərhələlərdə isə artıq yeriş, müvazinət pozulmasına, xasiyyətin, davranışın dəyişməsinə, sidik ifrazında tezləşmə və ya əksinə ləngiməyə gətirib çıxara bilər.

 

Mütəxəssis vurğulayıb ki, diaqnoz qoymaq üçün baş beyin, onurğa beyninin MRT müayinəsi aparılmalıdır:

“Müalicə prosesi kəskinləşmələrin aradan qaldırılması və xəstəliyin inkişafını tormozlayan müalicə formasında olmaqla, iki mərhələdə aparılır. Bu səbəbdən də xəstəliyin zamanında müalicəsinə başlamaq üçün vaxtında həkim-mütəxəssislərə müraciət etmək mütləqdir. Çünki dağınıq skleroz xəstəliyinin kəskinləşməsi müalicə prosesinin ləng getməsinə, yaranmış simptomların uzun müddət ərzində aradan qaldırılmasına səbəb olur. Xəstəliyin gedişatına uyğun olaraq ambulator və ya stasionar müalicə təyin edilir. Bununla yanaşı, fizioterapevtik üsullardan da istifadə etmək dağınıq skleroz xəstəliyinin müalicəsində önəmli rol oynaya bilir”.

Mütəxəssislər dağınıq skleroz xəstəliklərindən qorunmaq üçün düzgün qidalanmaya riayət etməyi, zərərli vərdişlərdən uzaq olmağı, eləcə də idmanla məşğul olmağı məsləhət görürlər.