Səhiyyə Nazirliyi V.Y.Axundov adına Elmi-Tədqiqat Tibbi Profilaktika İnstitutunda Özbəkistan Respublikasının Əbu Əli İbn-Sina adına Buxara Dövlət Tibb İnstitutunun Epidemiologiya kafedrasının müdiri, tibb elmləri doktoru, professor Mehriniso Mirzoyeva ilə görüş keçirilib.

İnstitutdan Aztibb.az-a bildirilib ki, müəssisənin direktoru, professor Adil Allahverdiyev qonağa institutun fəaliyyət istiqamətləri, elmi-tədqiqat və klinik laboratoriyaları, eləcə də klinik şöbə haqqında ətraflı məlumat verib.

Professor M.Mirzoyeva rəhbərlik etdiyi Epidemiologiya kafedrasının fəaliyyət istiqamətlərindən danışıb, gələcəkdə institutun Epidemiologiya və Tibbi Parazitologiya şöbələri ilə birgə elmi əməkdaşlığın faydalı olacağını bildirib.

Daha sonra Elmi-Tədqiqat Tibbi Profilaktika İnstitutu və Əbu Əli İbn-Sina adına Buxara Dövlət Tibb İnstitutu arasında elmi əməkdaşlığa dair memorandum imzalanıb.

Özbəkistanlı professor, həmçinin institutun elmi-tədqiqat və klinik laboratoriyaları, yoluxucu və parazitar xəstəliklər klinikalarında aparılan işlərlə tanış olub.