Şirvan Şəhər Mərkəzi Xəstəxanasının tabeliyindəki Hacıqəhrəmanlı qəsəbə həkim məntəqəsində yerli sakinlər üçün səyyar tibbi müayinə aksiyası təşkil olunub.

Xəstəxanadan Aztibb.az-a bildirilib ki, ixtisaslı həkim və laborant heyəti tərəfindən müayinə olunan şəxslərin diaqnozlarına uyğun müalicə təyin edilib.

Səyyar müayinə zamanı sakinlər kardioloqun konsultasiyasından faydalanıblar. Eyni zamanda, laboratoriyada müayinə olunmaq üçün vətəndaşlardan müvafiq qan nümunələri də götürülüb, oftalmoloji, terapevt və lor tərəfindən müayinələr aparılıb. Onlar ətraflı müayinə və müalicə məqsədilə Şirvan Şəhər Mərkəzi Xəstəxanasına dəvət olunub.

Səyyar tibbi aksiyanın məqsədi vətəndaşlara tibbi xidmətlərin əlçatanlığını təmin etməkdən, əhali arasında profilaktik müayinə mədəniyyətini, sağlam həyat tərzini təbliğ etməkdən ibarətdir.

Sakinlər aksiyanın təşkilatçılarına və həkim briqadasına minnətdarlıqlarını bildiriblər.