Azərbaycan Əmək və Sosial Münasibətlər Akademiyasında Həmkarlar İttifaqının Respublika Komitəsinin baş texniki əmək və əməyin texniki müfəttişləri (Aviasiya, Azərbaycan Milli Elmlər Akademiyası, Bələdiyyə, Baku Steel Company, Elektroenergetika və Elektrotexnika Sənayesi, Fövqəladə Hallar Nazirliyi, Azərsu, Kənd-Qida-İş Həmkarlar İttifaqı Federasiyası, Mədəniyyət, Müdafiə Sənayesi, Neft və Qaz Sənayesi, Sahibkarlıq, Özəl Elm və Yüngül Sənaye, Təbii Sərvətlər və Ekologiya, Təhsil, Yerli Sənaye və Kommunal-Məişət Müəssisələri) işçiləri üçün “İş yerlərində fiziki aktivliyin təbliği” mövzusunda maarifləndirici tədbir keçirilib.

 

Bu barədə Aztibb.az-a Səhiyyə Nazirliyinin İctimai Səhiyyə və İslahatlar Mərkəzindən (İSİM) xəbər verilib.

 

İSİM-in Layihələrin əlaqələndirilməsi şöbəsinin nümayəndəsi Elnarə Nuriyeva təqdimatla çıxış edərək sağlam həyat tərzi keçirməyin və fiziki aktiv olmağın əhəmiyyəti barədə ətraflı məlumat verib, gün ərzində ən azı 60 dəqiqə fiziki aktivliyə vaxt ayırmağın zəruriliyini, eyni zamanda yaxın məsafələrə piyada getməyin, pilləkənlə qalxıb-enməyə üstünlük verməyin əhəmiyyətini vurğulayıb.

 

İSİM-in Layihələrin əlaqələndirilməsi şöbəsinin müdir müavini Ülkər Camalova iştirakçılar tərəfindən verilən sualları cavablandırıb, sağlam həyat tərzinə dair faydalı tövsiyələri nəzərə çatdırıb.

 

Yekunda tədbir iştirakçılarına İSİM tərəfindən hazırlanaraq çap olunan maarifləndirici materiallar təqdim edilib.