Birləşmiş Millətlər Təşkilatı (BMT) İsrailin 8 aydır hücumlarını davam etdirdiyi və humanitar fəlakətə səbəb olduğu Qəzza zolağında yoluxucu xəstəliklərin artdığını açıqlayıb.

Aztibb.az-ın medimagazin.com.tr-yə istinadla məlumatına görə, BMT-nin Fələstinli Qaçqınlara Yardım və İşlər üzrə Agentliyinin (UNRWA) X sosial media hesabında etdiyi açıqlamada Qəzzadakı vəziyyətlə bağlı məlumat verilib.

Məlumatda bildirilir: "Ümumdünya Səhiyyə Təşkilatı Qəzzada yoluxucu xəstəliklərin, o cümlədən ishal və Hepatit A-ya şübhəli halların artdığını bildirib".

Açıqlamada məcburi köçkünlərin sığındığı sığınacaqlarda həddindən artıq sıxlığın və məcburi köçkünlük nəticəsində yaranan məhdud gigiyena şəraitinin ciddi sağlamlıq riskləri yaratdığı vurğulanıb. Qeyd olunub ki, Qəzza zolağında məcburi köçkünlük səbəbindən 1 milyon 95 fələstinlidə yoluxucu xəstəliklər aşkarlanıb, təxminən 20 min Hepatit A xəstəsi qeydə alınıb.