TƏBİB region xəstəxanalarında vətəndaşlara göstərilən tibbi xidmətlərin sayının və keyfiyyətinin artırılması, o cümlədən bu günədək yalnız paytaxtda icra olunun cərrahi əməliyyatların bölgə xəstəxanalarında da icra olunması istiqamətində yenilikləri davam etdirir.
Aztibb.az TƏBİB-in feysbuk səhifəsinə istinadla bildirir ki, Tərtər Rayon Mərkəzi Xəstəxanasında ilk dəfə həyata keçirilən laparoskopik əməliyyat uğurla başa çatıb.
Cərrahi əməliyyat Mərkəzin Cərrahiyyə şöbəsinin müdiri, tibb üzrə fəlsəfə doktoru Asəf Fərzəliyev və həkim-cərrah İlkin Əlizadə tərəfindən icra olunub. Eyni gündə iki pasiyent üzərində həyata keçirilən laparoskopik xolesistektomiya (qapalı üsulla öd kisəsinin xaric edilməsi) əməliyyatından sonrası pasiyentlər dinamik nəzarət məqsədilə intensiv terapiya şöbəsinə yerləşdirilib. Hazırda vəziyyətləri qənaətbəxşdir.
Xəstənin ailə üzvləri Tərtər Rayon Mərkəzi Xəstəxanasında yaradılan şəraitə, müəssisənin müasir tələblərə cavab verən yeni tibbi avadanlıqlarla təmin olunmasına və bölgə xəstəxanalarının inkişafına verilən dəstəyə görə Azərbaycan Respublikasının Prezidenti cənab İlham Əliyevə, Birinci-vitse prezident Mehriban xanım Əliyevaya, eləcə də TƏBİB-ə və İcbari Tibbi Sığorta üzrə Dövlət Agentliyinə öz minnətdarlıqlarını bildiriblər.
