Ümumdünya Səhiyyə Təşkilatının (ÜST) Avropa Regional Bürosunun qeyri-infeksion xəstəliklər və innovasiyalar üzrə xüsusi təşəbbüsü, ÜST-nin Qidalanma və Uşaq Piylənməsi üzrə Əməkdaşlıq Mərkəzi - Dr. Rikardo Jorj adına Milli Səhiyyə İnstitutunun Qida Məhsulları və Qidalanma üzrə Departamenti ilə birgə əməkdaşlığı çərçivəsində “COVID-19 pandemiyasının Avropada məktəbyaşlı uşaqların gündəlik həyat və davranışına təsiri: 17 üzv dövlətin göstəriciləri” adlı hesabatın onlayn təqdimatı olub.

Səhiyyə Nazirliyinin İctimai Səhiyyə vəİslahatlar Mərkəzindən (İSİM) Aztibb.az-a bildirilib ki, hibrid formatda keçirilən vebinar COVID-19 pandemiyasının uşaqların gündəlik rejiminə, rifahına, yemək davranışlarına, fiziki fəaliyyətinə və çəki göstəricilərinə təsirinin əsas nəticələrinin bölüşülməsi və gələcək perspektivlərin müzakirəsi məqsədilə təşkil edilib.

İSİM-in direktoru Qəhrəman Haqverdiyev panel müzakirələrdə çıxış edib. O, COVID-19 pandemiyası dövründə ÜST-nin dəstəyi ilə ölkəmizdə həyata keçirilən uşaqlarda artıq çəki və piylənmənin öyrənilməsi – COSI/ COVID-19 tədqiqatının nəticələri barədə ətraflı məlumat verib və sorğunun uşaqların sağlamlığının qorunması sahəsində gələcək tibbi araşdırmalara verə biləcəyi töhfələrdən bəhs edib.

Vebinarın yekununda mövzuya dair iştirakçı dövlətlərin nümayəndələrinin sualları cavablandırılıb, tövsiyələr səsləndirilib, ölkə səviyyəsində həyata keçiriləcək növbəti addımlar müzakirə olunub.