Qazaxıstanın paytaxtı Astana şəhərində "Səhiyyə texnologiyalarının qiymətləndirilməsi, inkişafı və maliyyələşdirilməsi üzrə prioritetlərin müəyyən edilməsi" mövzusunda beynəlxalq konfrans keçirilib.

 

Səhiyyə Nazirliyi İctimai Səhiyyə və İslahatlar Mərkəzindən (İSİM) Aztibb.az-a verilən xəbərə görə, konfransın keçirilməsində əsas məqsəd səhiyyə texnologiyalarının inkişafını təmin etməklə əhalinin onlara əlçatanlığını asanlaşdırmaq, müasir diaqnostika sistemini gücləndirmək, bu istiqamətdə olan mövcud problemləri müzakirə edərək ölkə təcrübələrini bölüşmək olub.

 

Konfransda Azərbaycan, Özbəkistan, Tacikistan, Türkiyə, ABŞ, Avstraliya, İtaliya, İspaniya, Polşa, Serbiya və İsveçdən gələn səhiyyə nümayəndələri iştirak ediblər.

 

İSİM-in Tibbi keyfiyyət standartları şöbəsinin müdiri Billurə Yusifova tədbirdə təqdimatla çıxış edərək Azərbaycanda əhalinin tibbi təminatı ilə bağlı mövcud dövlət proqramları, kilinik protokollar və sübutlara əsaslanan tibb vasitəsilə keyfiyyətin yüksəldilməsi və standartlaşdırılması barədə konfrans iştirakçılarına ətraflı məlumat verib.

 

Konfransın yekun plenar iclasında səhiyyə texnologiyalarının inkişafının regional perspektivləri, daha effektiv metodlarla problemlərin həlli və çıxış yolları müzakirə edilib, təkliflər dinlənilib.