Azərbaycan Respublikası Səhiyyə Nazirliyinin İctimai Səhiyyə və İslahatlar Mərkəzi (İSİM), Ailə, Qadın və Uşaq Problemləri üzrə Dövlət Komitəsinin birgə əməkdaşlığı ilə nazirliyin 1 nömrəli Tibb Kollecində “Reproduktiv sağlamlığın qorunması, qohum evliliklərinin fəsadları” mövzusunda maarifləndirici tədbir keçirilib.

Bu məlumat Aztibb.az-a İSİM-dən verilib.

Tədbir gənclər arasında sağlam həyat tərzinin təbliği, reproduktiv sağlamlıq və ailə planlaşdırılması ilə bağlı yeni nəslin maarifləndirilməsi məqsədilə təşkil olunub.

İSİM-in Monitorinq və təhlil şöbəsinin müdir muavini Zümrüd Kazımova geniş təqdimatla çıxış edərək, gənclərə reproduktiv sağlamlığın əsas amillərindən, fərdi gigiyena qaydaları, ailə planlaşdırılması və müasir kontraseptiv üsullar barədə ətraflı məlumat verib. O, həmçinin erkən nikah və qohumlar arasında nikahın mənfi nəticələrindən bəhs edərək bildirib ki, cütlüklər arasındakı qan bağının yaxınlıq dərəcəsi artdıqca, irsi yolla ötürülən xəstəliklərin meydana çıxma riski yüksəlir.

Tədbirdə qohum nikahların fəsadları, irsi yolla ötürülən xəstəliklər barədə ətraflı məlumat verilib, nikahdan öncə aparılan tibbi müayinənin vacibliyi vurğulanıb.

Yekunda iştirakçıları maraqlandıran suallar cavablandırılıb və onlara İSİM tərəfindən hazırlanaraq çap edilən maarifləndirici materiallar təqdim edilib.