Naxçıvan Muxtar Respublikası Perinatal Mərkəzdə BMT-nin Uşaq Fondu UNİCEF-in “Körpə Dostu Klinikası Təşəbbüsü” proqramı çərçivəsində “Ana südü ilə qidalandırmaya doğru 10 addım” mövzusunda təlimlərə başlanılıb.

 

Aztibb.az-a Naxçıvan MR Səhiyyə Nazirliyindən verilən xəbərə görə, aprel ayının 2-dən 4-dək baş tutacaq təlimlərdə məqsəd ana südü ilə qidalandırmanın təşviqi, süni qida vasitələrinin, əmzikli şüşələrin və əmziklərin təbliğatının aparılmaması, ana südü ilə qidalanmanın həm körpə, həm də ana üçün əhəmiyyəti və qidalandırma zamanı yaranan çətinliklərin həlli yolları barədə həkim və orta tibb heyətinin bilik və bacarıq səviyyələrinin artırılmasından ibarətdir.

 

Təlimlərin açılış mərasimində çıxış edən Naxçıvan Muxtar Respublikası Perinatal Mərkəzin direktoru Ülkər Bayramova bildirib ki, ölkəmizdə uşaq hüquqları əsaslı şəkildə qorunur. Belə ki, Azərbaycan Respublikası Prezidentinin 2 iyun 2020-ci il tarixli Sərəncamı ilə təsdiq edilmiş “Azərbaycan Respublikasının Uşaqlara dair 2020-2030-cu illər üçün Strategiyası”na uyğun olaraq, ölkəmizdə, o cümlədən muxtar respublikamızda müvafiq tədbirlər həyata keçirilir. Respublikamızda uşaqların müdafiəsi və inkişafı,onların hüquqlarının qorunması dövlətin sosial siyasətində mühüm yer tutur.

 

Sonra UNİCEF-in Azərbaycandakı nümayəndəliyinin Səhiyyə və qidalanma proqramının rəhbəri Töfvə Cəmilova çıxış edərək ana südü ilə qidalanmanın həm əhali arasında, həm də doğuşayardım tibb müəssisələrində geniş təşviq edilməsinin əhəmiyyətini vurğulayıb.

 

Çıxışların ardından təlimlərə start verilib.