Nevroloq Afaq Əliyeva: "Ölkəmizdə 5000 uşaq və yeniyetmə autizm sindromludur"
02.04.2024 11:27
Məlum olduğu kimi, autizm sindromlu insanların sosial problemlərini öyrənmək, onlara göstərilən diqqət və qayğını artırmaq üçün Birləşmiş Millətlər Təşkilatının qərarı ilə 2011-ci ildən 2 aprel tarixi Ümumdünya Autizm Məlumatlandırma Günü kimi qeyd olunur.
 
Xətai Tibb Mərkəzinin Nevrologiya şöbəsinin müdiri, nevroloq Afaq Əliyeva Aztibb.az-a Ümumdünya Autizm Maarifləndirmə Günü ilə bağlı məlumat verib.
 
Həkim bildirib ki, dünyada 75 mln. insan autizmdən əziyyət çəkir. Ölkəmizdə 5000 uşaq və yeniyetmə autizm sindromludur.
 
Onun sözlərinə görə, bu uşaqlara xəstə kimi yox, fərqli insan kimi münasibət və yanaşma olmalıdır.
 
Autizmin əlamətlərinin 2 yaşından özünü büruzə verdiyini deyən nevroloq qeyd edib ki, bu əlamətlərə nitq ləngiməsi, davranış pozuntusu, göz kontaktının olmaması, daha çox əşyalara meyilli olması, təkliyə çəkilməsi, təmas və qucaqlanmanı sevməməsi, hər hansı dəyişikliyə həddindən artıq həssas reaksiya verməsini misal göstərmək olar.
 
Afaq Əliyeva vurğulayıb ki, valideyinlər uşaqlarında hiss etdikləri bu cür əlamətlərə biganə qalmamalı və mütləq psixonevroloqa müraciət etməlidirlər. Autizm müalicəsi uzun sürən çətin bir prosesdir. Müalicə təkcə tibb müəssisəsində deyil, evdə, bağçada, mühitdə aparılmalıdır.