Bu barədə Aztibb.az-a Mingəçevir Şəhər Mərkəzi Xəstəxanası Uşaq Nevroloji Sanatoriyası şöbəsinin baş həkimi Sevinc Abbasova məlumat verib.

Həkimin sözlərinə görə, erkən diaqnoz nə qədər tez qoyulsa, müsbət nəticə əldə etmək bir o qədər asan olar. Belə uşaqlarda göz təması məhduddur və ya yoxdur, ətrafa laqeyddir, adına reaksiya vermir. Çox hərəkətli və ya hərəkətsiz olur.

 

Autizmin simptomlarını sadalayan Sevinc Abbasova qeyd edib ki, bəzi uşaqlar fiziki təmasa (öpmək, qucaqlamaq və s.) icazə vermir, ya da xoşu gəlmir. Əksər hallarda insanlara deyil, cansız varlıqlara meyilli olur, sosial və psixoloji baxımdan özünü təcrid edir, istədiyi şeyi barmağı ilə göstərmir, oyuncaqlarla oynamağı bacarmır, yaşıdlarının oynadığı oyunlara maraq göstərmirlər: "Uşaqlar bəzi sözləri təkrar-təkrar və yersiz söyləyir, nitq inkişafı cəhətdən yaşıdlarından geridə qalır. Gözləri bir səmtə zillənib qalır. Bəziləri çox inadcıldır. Yemək yemə problemləri olur. Müəyyən əşyalara lazımsız yerə bağlanır, səbəbsiz yerə stresli və məyus olurlar".

 

Sevinc Abbasova bildirib ki, autizm xəstəlik deyil, fərqlilikdir. O, övladında bu cür halları müşahidə edən valideynləin mütləq həkimə müraciət etməli olduqlarını vurğulayıb.