Azərbaycan Respublikası Səhiyyə Nazirliyinin Elmi-Tədqiqat Tibbi Bərpa İnstitutunda Təşkilati-metodik şöbənin təşkilatçılığı ilə "Şərqi Zəngəzur ərazilərinin mineral suları" mövzusunda seminar keçirilib.

 

İnstitutdan Aztibb.az-a verilən məlumata görə, tədbirdə Kurort ehtiyatlarının öyrənilməsi şöbəsinin böyük elmi işçisi, b.ü.f.d. Rübayə Əbilova mövzu üzrə çıxış edib.

R.Əbilova Azərbaycanda müalicəvi mineral suların əsasən Kəlbəcər və Laçın zonalarında yerləşdiyini bildirib, keçən əsrin 90-cı illərinə qədər Azərbaycan Elmi- Tədqiqat Tibbi Bərpa İnstitutunun əməkdaşları tərəfindən bu suların fiziki-kimyəvi xüsusiyyətlərinin öyrənilməsi və balneoloji cəhətdən dəyərləndirilməsi barədə məlumat verib.

 

Bildirib ki, hidromineral ehtiyatlarla zəngin olan Qarabağ ərazisində çıxan məlum olan 25-dən çox öyrənilən mineral sular geniş spektorlu yüksək təsirə malikdirlər. Laçın və Kəlbəcər rayonlarında olan 63 bulaqdan öz fiziki-kimyəvi xüsusiyyətlərinə görə İstisu (Kəlbəcər rayonu) və İlıqsu (Laçın rayonu) daha çox əhəmiyyət kəsb edir.

 

Məruzəçi təqdim edilən mineral suların analizlərinin nəticələrinin və məlumatlarının işğaldan əvvəl toplandığı nəzərə alınsa, bu su nümunələrinin təkrar tərkibinin öyrənilməsi və onların müalicəvi əhəmiyyətinin yenidən dəyərləndirilməsinin zəruri olduğunu vurğulayıb. Qeyd edib ki, Kəlbəcər rayonunda hipertermal və nadir tərkibli müalicəvi içməli suların cəmləşməsi bu ərazilərdə müalicə xidməti, sanatoriya, balneoloji müalicəxana və s. kurort müəssisələrinin yaradılması üçün istiqamət verir.