Talassemiya və hemofiliya xəstəliyinə düçar olmuş uşaqlara yardım məqsədilə Mərkəzi Qan bankının Şəki bölməsində qanvermə aksiyası keçirilib.

Aksiyada Şəki Rayon Mərkəzi Xəstəxanasının tibb işçiləri-həkimlər, tibb bacıları, qeyri-tibb işçiləri fəal iştirak ediblər.

Bu barədə Aztibb.az-a Şəki RMX-dan verilib.

Aksiyada Səhiyyə Nazirliyinin Hemotologiya və Transfiziologiya İnstitutunun Mərkəzi Qan Bankının tibb briqadasının həkim-hemotoloqları donorların sağlamlıq vəziyyətini yoxladıqdan sonra onlardan qan götürüblər.

Qan nümunələri xüsusi laboratoriyada yoxlamadan keçiriləcək və irsi qan xəstələrinin müalicəsində istifadə etmək üçün Mərkəzi Qan Bankında toplanacaq.

Qanvermə aksiyası Azərbaycan Respublikasının Prezidenti İlham Əliyevin müvafiq sərəncamı ilə təsdiqlənmiş "Hemofiliya və talassemiyadan əziyyət çəkən uşaqlara qayğı" Dövlət Proqramının icrası çərçivəsində həyata keçirilən tədbirlərə dəstək vermək məqsədilə təşkil olunub.