Uşaqlarda ilk keçid dövrü 3-4 yaş arası başlayır. Ona görə də uşaqlara olar-olmazı, həmin dövrdən başa salmaq lazımdır. Öncə nəzərə alınmalıdır ki, uşaqlar da böyüklər kimi hisslərə, duyğulara sahibdirlər. Öyəndiklərinin 50%-ni bu dövrdə öyrənirlər. Onlar bəzən səbrsiz, gurultulu və ya tələbkar ola bilərlər. Onların fikrincə, dünyanın mərkəzindədirlər, dünya onların üzərində qurulub. Belə uşaqlardan bir yetkin kimi davranmağı gözləmək onların hisslərinə toxunmaq deməkdir.

 

Aztibb.az xəbər verir ki, bu barədə məlumat verən Mingəçevir Şəhər Mərkəzi Xəstəxanasının həkim-nevroloqu Vüsalə Aşurova bildirib ki, “yox” sözünü işlədərkən nə çox sərt, nə də mülayim olmaq gərəkdir. Onun sözlərinə görə, uşaqlar gərgin, əsəbi olanda onlara icazə verin ki, hisslərini yaşaya bilsinlər. Arxasınca getməyin, icazə verin ki, tək qalıb əsəbini sakitləşdirə bilsin. Sakitləşəndən sonra özü sizin yanınıza gələcək. Uşaqlar əsəbi olanda heç bir zaman şiddət göstərməyin, onları döyməyin. Əksinə, hirsli uşağa sarılmaqla onu sakitləşdirə bilərsiniz.

 

V.Aşurova əlavə edib ki, uşaqlar valideynlərin küsə və inciyə bilərlər:

“Ancaq biz onlarla sərt davranmamalıyıq. Çünki uşaq bizimlə formalaşır. Danışığı, düşüncələri, davranışlarını biz formalaşdırırıq. Hər zaman uşağa yanında olduğunuzu hiss etdirməlisiniz. Uşağa əmr etməyin, ona seçmək haqqı buraxın. Uşağa hansısa işi gördürmək istəyəndə çalışın, mülayim dillə danışın. Əgər həddən artıq əsəbiləşmisinizsə, uşağın olduğu mühitdən uzaq durun. Uşaq sizi başa düşmürsə, ona "yox" deməyi bacarın. "Yox” sözü neytral emosiyasız deyilməlidir. Çünki onu münasibətlərin aydınlaşmasında deyil, tərbiyə prosesində istifadə etmək lazımdır”.