Mərkəzi Gömrük Hospitalının Laboratoriya şöbəsinin birinci kurs həkim-rezidenti Eltun Əzizov “Laboratoriyada pre-analitik mərhələ və onun əhəmiyyəti” mövzusunda təqdimatla çıxış edib.

Hospitaldan Aztibb.az-a bildirilib ki, tədbirdə Dövlət Gömrük Komitəsinin Tibbi Xidmət İdarəsinin Elmi-Təcrübi Tədris Mərkəzinin mütəxəssisi Şəhla Mirzəzadə, Mərkəzi Gömrük Hospitalının Laboratoriya şöbəsinin rəisi Səbinə İbrahimova, Laboratoriya şöbəsinin əməkdaşları, rezidentlər və tibb tələbələri iştirak ediblər.

Tədbiri giriş sözü ilə açan Mərkəzi Gömrük Hospitalının Laboratoriya şöbəsinin rəisi Səbinə İbrahimova qeyd edib ki, tibbi laboratoriya hospitalın ayrılmaz hissəsidir. Pasiyentlər hər hansı bir şikayət olduqda həkimə müraciət edir, həkim isə öz növbəsində müvafiq müayinələri təyin edir. Daha sonra pasiyentlər laboratoriyaya yaxınlaşır və lazımi analizləri verirlər.

Mərkəzi Gömrük Hospitalının Laboratoriya şöbəsinin həkim-rezidenti Eltun Əzizov təqdimatda qanalma prosedurların düzgün təşkili, nümunələrin təhlükəsiz qaydada laboratoriyaya çatdırılması və işlənilməsi, həmçinin laboratoriyada pre-analitik mərhələdə yol verilən xətalar və onların aradan qaldırılması haqqında danışaraq həlli yollarını sadalayıb və öz tövsiyələrini verib.