Uşaq cərrahlarının növbəti aylıq elmi toplantısı Mərkəzi Gömrük Hospitalında həyata keçirilib.

 

Tədbirdə Dövlət Gömrük Komitəsinin Tibbi Xidmət İdarəsinin rəis müavini, t.ü.f.d., dosent İsmayıl Əfəndiyev, Elmi-Təcrübi və Tədris Mərkəzinin mütəxəssisi Şəhla Mirzəzadə, Mərkəzi Gömrük Hospitalının Uşaq Cərrahiyyəsi şöbəsinin rəisi Vüsal Cəfərov, uşaq cərrahı Toğrul Piriyev, o cümlədən müxtəlif tibb müəssisələrində uşaq cərrahiyyəsi üzrə ixtisaslaşan rezidentlər və onların kuratorları iştirak ediblər.

 

Bu barədə Aztibb.az-a Mərkəzi Gömrük Hospitalından xəbər verilib.

 

Elmi toplantını giriş sözü ilə açan Dövlət Gömrük Komitəsinin Tibbi Xidmət İdarəsinin rəis müavini, t.ü.f.d., dosent İsmayıl Əfəndiyev kurator və rezidentləri salamlayıb. O, Tibbi Xidmət İdarəsinin Elmi-Təcrübi və Tədris Mərkəzinin mütəxəssislərarası təcrübə mübadiləsinin təşkil edilməsi istiqamətində olan elmi fəaliyyətləri barədə geniş məlumat verib və bu istiqamətdə olan əməkdaşlıqlara daim dəstək olmağa hazır olduğunu qeyd edib.

 

Daha sonra Ege Hospitalın uşaq cərrahı, t.ü.f.d., dosent Allahverdi Musayev “Nekrotik pnevmoniya”, Mərkəzi Klinikanın uşaq cərrahı, t.ü.f.d. Fuad Hüseynov “Ağciyərin kistik xəstəliyi” və Nizami Tibb Mərkəzinin uzman uşaq cərrahı Cavid Nağıyev “Böyrək çıxışı darlığı səbəbilə ağırlaşmış xəstənin cərrahi müalicəsi” mövzularında təqdimatla çıxış ediblər və auditoriyanı maraqlandıran sualları cavablandırıblar.

 

Elmi toplantı zamanı aktiv müzakirələr həyata keçirilib. Sonda toplantı iştirakçıları Mərkəzi Gömrük Hospitalında tədbirin yüksək səviyyədə təşkilinə görə Dövlət Gömrük Komitəsinin Tibbi Xidmət İdarəsinin rəhbərliyinə və əməkdaşlarına təşəkkür ediblər.