Panel müzakirəsində məruzə ilə çıxış edən Hande Harmancı ÜST-nin təbliğ etdiyi balanslaşdırılmış pəhrizin vacibliyini vurğulayaraq, düzgün qidalanmanın insan sağlamlığının başlıca meyarlarından biri olduğunu bildirib. O, qida seçimlərinin təkcə fərdin sağlamlığına deyil, həm də planetin sağlamlığına təsir etdiyini deyib, davamlı pəhriz vərdişlərinin ətraf mühitə dəyən zərərin azaldılması və qlobal sağlamlığın təşviqi üçün vacibliyini qeyd edib.

 

Hande Harmancı bildirib ki, Azərbaycanın qida təhlükəsizliyinin təmin edilməsində göstərdiyi səylər təqdirəlayiqdir. Bununla belə, xüsusilə reproduktiv yaşda olan qadınlar arasında yüksək anemiya dərəcələri ilə bağlı narahatlıqlar qaldırılıb: "Bu isə dəmir qəbulunu və ümumi qidalanma vəziyyətini yaxşılaşdırmaq üçün məqsədyönlü müdaxilələrin zəruriliyini göstərir. Azərbaycanda sağlam pəhrizin qiyməti nisbətən aşağı olsa da, bəsləyici qidalara və bununla bağlı məlumatlara hamının bərabər əlçatanlığını təmin etmək üçün səyləri artırmaq lazımdır".