O, 1971-ci ildə Bakı şəhərində anadan olub. 1988-1994-ci illər ərzində Azərbaycan Tibb Universitetinin II Müalicə-profilaktika fakültəsində təhsil alıb. 1994-1995-ci il tarixlərində Respublika Uroloji Klinik Xəstəxanasında internatura keçərək uroloq ixtisası üzrə təhsil alıb.

 

Pərviz Nəsirov 1995-1997-ci illərdə Akademik M. Cavadzədə adına Respublika Uroloji Klinik Xəstəxanasında uroloq işləyib. 1997-2000-ci illlərdə Azərbaycan Müdafiə Nazirliyinin Cəbhəyanı hərbi səhra xəstəxanasında cərrah baş ordinator, tibb xidməti kapitanı rütbəsinə kimi hərbi xidmətdə olub. 2001-2007-ci illərdə ümumi cərrahiyyə və urologiyada olan təcrübəsini Səudiyyə Ərəbistanı Krallığının Səhiyyə Nazirliyinin dəvəti ilə davam etdirib, təxirəsalınmaz təbabət, cərrahiyyə və urologiyaya aid Аmerika İntensiv Terapiya Cəmiyyəti, Amerika Cərrahlar Koleci tərəfindən təşkil olunmuş müxtəlif kurs və təlimlərdə iştirak edib.

 

Həkim 2017-ci ilin fevral ayından Ə.Əliyev adına Azərbaycan Dövlət Həkimləri Təkminləşdirmə İnstitututunun Urologiya kafedrasında fəlsəfə doktoru proqramı üzrə doktoranturaya qəbul olunub. O, Azərbaycanda və xaricdə çapdan çıxmış 20-dən çox məqalənin müəllifi, Amerika, Avropa və Rusiya Uroloqlar cəmiyyətlərinin həqiqi üzvüdür.

 

Pərviz Nəsirov 2019-cu ildən Ağdaş Rayon Mərkəzi Xəstəxanasında həkim-uroloq vəzifəsində çalışır. 2020- ci ildə Vətən müharibəsində həkim-cərrah kimi iştirakına görə Fəxri fərmanla təltif olunub.