Mərkəzi Gömrük Hospitalının Dermatovenerologiya şöbəsinin dermatoveneroloqu Sevinc Kərimova “Atopik dermatit” mövzusunda növbəti seminar çərçivəsində təqdimatla çıxış edib.

 

Tədbirdə Azərbaycan Respublikası Dövlət Gömrük Komitəsi Tibbi Xidmət İdarəsinin rəis müavini t.ü.f.d., dosent İsmayıl Əfəndiyev, Mərkəzi Gömrük Hospitalının rəis müavini Nabil Seyidov, həkimlər, kardioloqlar, dermatovenerologiya ixtisası üzrə təhsil alan həkim-rezidentlər və tibb tələbələri iştirak ediblər.

 

Bu məlumat Aztibb.az-a Mərkəzi Gömrük Hospitalından verilib.

 

Sevinc Kərimova residivlərlə müşayiət olunan xroniki, genetik, dəri xəstəliyi olan atopik dermatit haqqında ətraflı məlumat verib. O, xəstəliyin genetik ağırlaşma riskindən, etiopatogenezindən, patogenezindən, əlamətlərindən, eyni zamanda xəstəliyin körpəlik, uşaqlıq, yeniyetməlik və yetkinlik dövrlərində gedişatından danışaraq, hər bir dövrün klinik əlamətlərini qeyd edib. 

 

Məruzəçi atopik dermatitin müalicə yollarından danışaraq, onun uzun müddət nəmləndirici emolentlər, kalsinevrinin topikal bolkatorları, antihistaminlər vasitəsilə, fototerapiya ilə, eləcə də ağırlaşmalar zamanı sistem steroidlər, topikal steroidlər və çiklosporin, azatioprin ilə müalicəsindən bəhs edib.

 

Sonda o, dinləyicilərin çoxsaylı suallarını cavablandırıb.