Bəzən böyrək daşları sidik axarına düşənə kimi, heç bir kliniki əlamətlə özünü göstərmir. Belə olduqda isə şiddətli ağrı şikayətilə müraciət edən xəstə, USM zamanı sidik axarında daş olduğunu öyrənir.

 

Bu barədə  Aztibb.az-a məlumat verən Kliniki Tibbi Mərkəzin həkim-radioloqu Şəbnəm Topbaştekin bildirib ki, sidik axarında daş olan xəstələrdə şiddətli ağrı, yüksək tempratur, ürəkbulanma və qusma, baş ağrısı, yüksək təzyiq kimi kliniki əlamətlər olur.

 

"Sidik axarında uzun müddət qalan daş kanalı tutduğu üçün sidiyin tam xaric olunmasına mane olur, bu da böyrək çatışmazlığına qədər gətirib çıxarır", - deyən həkim sidik axarındakı daşın orqanizmdən xaric edilməsinə bəzi faktorların təsir etdiyini söyləyib. Qeyd edib ki, buna ilk növbədə, daşın böyüklüyü aiddir. Belə ki, ölçüsü 5 mm-dən kiçik olan daşların əksər hallarda cərrahi müdaxiləsiz düşmə ehtimalı yüksəkdir. 7 mm ölçüsündəki daş 45% hallarda, 10 mm olan daşlar isə 25% hallarda özü düşə bilir.

 

Şəbnəm Topbaştekinin sözlərinə görə, sidik axarlarının anatomik olaraq 3 daralma hissəsi olur. Əgər daş aşağı daralma hissəsindədirsə, 70-75 % hallarda düşür. Yuxarı və orta hissədə olan daşların müdaxiləsiz düşmə ehtimalı daha azdır. Ureterin (sidik axarının) eyni yerində uzun müddət qalan daşlar ödemə səbəb olub, axarın divarı şişkinlik əmələ gətirir. Bu isə, daşın düşməsini çətinləşdirir. 30 gündən çox eyni yerdə qalan daşlara cərrahi müdaxilə mütləqdir. Daşın üzəri hamar olduqda erkən, girintili-çıxıntılı olduqda isə daha gec müddətdə xaric edilir.