Erkən hamiləlik əlamətləri hər qadında fərqli ola bilər. İlk əlamət aybaşının bir neçə gün gecikməsidir. Təbi ki, bu, gecikməsi olmayan, hər ay aybaşı tsikli olan qadınlara aiddir.

 

Bu barədə  Aztibb.az-a Kliniki Tibbi Mərkəzin həkim-radioloqu Şəbnəm Topbaştekin məlumat verib.

 

Onun sözlərinə görə, hamiləliyi erkən öyrənmənin ən əlçatan üsulu hamiləlik üçün olan test çubuqlarıdır. Bu çubuqlar demək olar ki, hər aptekdə asanlıqla tapılır və sidiyə batırılalaraq, 5-10 dəq gözləmədən sonra nəticəni göstərir. 

 

Həkim bildirib ki, ən dəqiq və hətta hamiləliyin müddətini belə təyin edən metod isə qan analizidir. Bu, hamiləlik müddətində qanda spesifik hormonun artmasına əsaslanır.

 

Şəbnəm Topbaştekin qadın bədənində erkən hamiləliklə əlaqədar baş verən dəyişikliklərə də diqqət çəkib:

1 ay müddətində hormonal dəyişikliklə əlaqədar süd vəzilərinin uclarının sərtləşməsi və şişkin olması;

Sidik ifrazının artması;

Qasıq ağrıları. Bu əlamət olduqda bəzən ləkələnmə şəklində qanaxma da ola bilər;

Uşaqlıq yolu axıntıları;

Ürəkbulanma və yorğunluq;

Şişkinlik.

 

"Hamiləliyini erkən aşkar edən analar özünü hamiləliyə daha düzgün hazırlaya bilər. Zərərli vərdişlərdən uzaq olub, sağlam həyat tərzi keçirtməlidir ki, sağlam uşaq doğulsun. Hamiləliyin erkən vaxtında öyrənilməsi, uşaqlıq borularının partlaması ilə nəticələnən uşaqlıqdankənar hamiləlik kimi ciddi patologiyaların qarşısını zamanında almağa kömək edir", - deyə həkim bildirib.