TƏBİB-in İcraçı direktoru Vüqar Qurbanovun təqdimatı ilə Qusar Rayon Mərkəzi Xəstəxanasına direktor təyin edilib. Xəstəxananın direktoru vəzifəsi Kamil Hacıyevə həvalə olunub.

Aztibb.az-a TƏBİB-dən verilən məlumata görə, qurumun İcraçı direktorunun müavini Anar İsrafilov bu gün yeni təyin olunmuş K.Hacıyevi kollektivə təqdim edib.

Qeyd edək ki, K.Hacıyev 1989-1995-ci illərdə Azərbaycan Tibb Universitetinin Müalicə işi fakültəsində təhsil alıb. 1997-2000-ci illərdə isə təhsilini Türkiyədə davam etdirərək cərrahiyyə üzrə ixtisasını artırıb.

2000-2019-cu illərdə K.Hacıyev Kliniki Tibbi Mərkəzdə həkim-cərrah kimi fəaliyyət göstərib.

O, 2019-2024-cü illərdə Bakıda özəl tibb müəssisələrinin birində cərrahiyyə şöbəsinin müdiri, eyni zamanda 2020-ci ildən etibarən İ.M.Seçenov adına Birinci Moskva Dövlət Tibb Universitetinin Bakı filialının Ümumi cərrahiyyə kafedrasının assistenti vəzifəsində çalışıb.

2011-ci ildə tibb üzrə fəlsəfə doktoru dərəcəsi alıb, əmək fəaliyyətinə görə 2 dəfə fəxri fərmanla təltif olunub.