Ümumdünya Səhiyyə Təşkilatının (ÜST) sözçüsü Tarik Jasareviç deyib ki, Qəzzada infrastrukturun, o cümlədən çətinliklə sağ qalan səhiyyə sisteminin bərpası onilliklər çəkəcək.

Aztibb.az-ın medimagazin.com.tr-yə istinadla məlumatına görə, o, Qəzzada müharibənin görünməmiş dağıntılara səbəb olduğunu söyləyib. Tarik Jasareviç mülki infrastrukturun, o cümlədən evlər, xəstəxanalar, məktəblər və su obyektlərinin 70-80 faizinin dağıldığını və ya ciddi şəkildə zədələndiyini vurğulayıb.

Tarik Jasareviç Birləşmiş Millətlər Təşkilatının Ətraf Mühit Proqramının (UNEP) təkcə Qəzzada dağıntıların və xarabalıqların təmizlənməsinin 3-12 il çəkəcəyini təxmin etdiyini xatırladıb. O, zərərin aradan qaldırılmasının on milyardlarla dollara başa gələcəyinin proqnozlaşdırıldığını qeyd edib: "Qəzzada 36 xəstəxanadan 13-ü qismən xidmət göstərə bilər. Onların əksəriyyəti Qəzzanın cənubunda yerləşir".