Türkiyənin Konya şəhərində “Beynəlxalq Akademik Təcili Tibbi Yardım Konqresi” keçirilib.

“Acil Akademik Eğitim Derneği”-nin təşkilatçılığı ilə keçirilən konqresdə TƏBİB-in Tibbi xidmətlərin təşkili departamentinin Tibbi koordinasiya şöbəsinin müdiri Mübariz Ağayev iştirak edib.

TƏBİB-dən Aztibb.az-a bildirilib ki, konqresin məqsədi təcili yardım xidmətlərinin idarə edilməsi mövzusu üzrə bilik və bacarıqların artırılması, təcili və təxirəsalınmaz tibbi yardımın müasir dünya standartlarına uyğun təşkil olunması, çağırışlar zamanı çeşidlənmə, triaj aparılarkən yaranan çətinliklərin aradan qaldırılması ilə bağlı təkliflərin müzakirəsi, eləcə də xəstələrin təxliyə qaydalarının təkmilləşdirilməsindən ibarət olub. 

Konqresdə çıxış edən M.Ağayev son illərdə Azərbaycanda təcili tibbi yardım sisteminin inkişafı, bu sahədə əldə olunan müsbət nəticələr barədə konqres iştirakçılarına geniş məlumat verib. Tədbirdə, o cümlədən Azərbaycan və digər Avropa ölkələrinin təcili yardım sistemlərinin diferensial müqayisəsi aparılıb. 

Bolqarıstan, Rumıniya və Orta Asiya ölkələrinin nümayəndələrinin iştirakı ilə keçirilən konqres maraqlı müzakirələrlə yadda qalıb.