Mərkəzi Gömrük Hospitalında "Yeni aşkarlanmış diabetdə terapiyaya yanaşma” mövzusunda seminar keçirilib.

Hospitaldan Aztibb.az-a bildirilib lo, tədbirdə həkim-endokrinoloq Şəbnəm Əlirzayeva mövzu üzrə təqdimatla çıxış edib.

O, şəkərli diabet haqqında ətraflı məlumat verərək, xəstəliyin əsas əlamətləri, epidemiologiyası, şəkərli diabetin tipləri, bu tipləri fərqləndirən əlamətlər və diaqnostikasından danışıb. Şəkərli diabetin 2 tipini fərqləndirən Şəbnəm Əlirzayeva 1-ci tip şəkərli diabet xəstələri üçün insulin terapiyası və insulin pompasından istifadə qaydalarını izah edib.

Sonra həkim son vaxtlar daha çox rast gəlinən 2-ci tip şəkərli diabetin risk qruplarından danışaraq, xəstələr üçün müalicə üsullarını sadalayıb və tövsiyələrini verib. O, şəkərli diabetin müalicəsi zamanı düzgün qidalanmanın, fiziki aktivliyin də rolunu qeyd edib, dərman preparatları barədə ətraflı məlumat verib.

Seminar həkimlər, orta tibb işçiləri və rezidentlər tərəfindən maraqla qarşılanıb, təlimin sonunda iştirakçıları maraqlandıran suallar cavablandırılıb.