Hər il fevral ayının 15-i dünyada Beynəlxalq Uşaq Xərçəng Xəstəlikləri ilə Mübarizə Günü kimi qeyd edilir. Həmin gün ilk dəfə Uşaq Valideynlərinin Ümumdünya Konfederasiyasının təşəbbüsü ilə 2001-ci ildən təqvimə daxil edilib.

Aztibb.az xəbər verir ki, bu günün təsis edilməsində məqsəd uşaq xərçəngi ilə bağlı məlumatlılığı artırmaq, xərçəng xəstəliyindən əziyyət çəkən uşaq və yeniyetmələrə, o cümlədən xəstəlikdən sağalanlara və onların ailələrinə dəstək ifadə etməkdir. Hər ilin bu günü keçirilən müxtəlif tədbir və kampaniyaların məramı dünya ictimaiyyətinin diqqətini onkoloji xəstəliklərdən əziyyət çəkən uşaqlara yönəltməkdir.

Ümumdünya Səhiyyə Təşkilatının məlumatına görə, hər il dünyada 400 min uşağa və 20 yaşınadək yeniyetmə xərçəng xəstəliyinə mübtəla olur. Hər il təxminən 100 min uşaq xərçəng xəstəliyindən vəfat edir.