Respublika Klinik Xəstəxanasında Ümumdünya Uşaq Epilepsiyası Günü qeyd olunub

14.02.2024 15:04

Akademik M.Ə.Mirqasımov adına Respublika Klinik Xəstəxanasında Ümumdünya Uşaq Epilepsiyası Günü ilə bağlı tədbir keçirilib.

Xəstəxanadan Aztibb.az-a verilən xəbərə görə, açılış nitqi ilə çıxış edən Baş həkim Sərdar Əsədov Ümumdünya Səhiyyə Təşkilatının məlumatına əsasən 65 milyon nəfər yer kürəsi əhalisinin 1 faizə qədərinin epilepsiyadan əziyyət çəkdiyini bildirib. Qeyd edib ki, onlardan yalnız 25 faizi adekvat müalicə alır. Müasir dərmanlar 70 faiz xəstələrin ürək tutmalarından tamamilə xilas olmasına imkan verir. Həmin preparatlar səmərəli olmaqla yanaşı, az toksiki təsirə malikdir, əhval-ruhiyyəyə və psixikaya təsir etmir. Sərdar Əsədov vurğulayıb ki, epilepsiya xəstələri təhsil alır, işləyir, ailə qurur, dünyaya sağlam övlad gətirir və tam normal həyat yaşayırlar.

Daha sonra çıxış edən Respublika Klinik Xəstəxanasının Sinir xəstəlikləri şöbəsinin müdiri Aytən Hüseynova son 15 ildə Azərbaycanda epilepsiya ilə bağlı problemlərin həlli istiqamətində görülən işlərdən danışıb. Qeyd edib ki, ölkəmizdə epilepsiyanın epidemiologiyası, xəstəliyin nazoloji və semioloji strukturu, onların həyat keyfiyyəti öyrənilib, müxtəlif tədqiqatlar aparılıb. Tədqiqatlarda epilepsiyalar zamanı mövcud olan qeydiyyat sisteminin, diaqnostikanın keyfiyyətinin, müalicənin və sosial yardımın qiymətləndirilməsi aparılıb.

Aytən Hüseynova diqqətə çatdırıb ki, ölkəmizdə epilepsiyadan əziyyət çəkən vətəndaşlara yüksək səviyyədə tibbi yardım göstərilir: "Bunlardan xəstələrin tibbi yardım və birinci səviyyə antiepileptik dərmanlarla dövlət hesabına təmin olunmasını, əlilliyə görə müavinətin ayrılmasını, epilepsiya əleyhinə preparatlarla təchizat, diaqnozun təyinində və differensə olunmuş müalicədə həkim-epileptoloqların konsultasiyalarının təşkili, epilepsiyalı hamilə qadınlarda mümkün ola biləcək ağırlaşmaların vaxtında qarşısının alınması məqsədi ilə onların daim həkim-epileptoloqun və ginekoloqların ciddi nəzarətdə saxlanmasını misal çəkmək olar”.

Tədbirdə Ülkər Mürsəlova "Epileptik ensefalopatiyalar", Nərgiz Əliyeva" Uşaqlarda epilepsiya xəstəliyinin idarə olunması, epileptik status zamanı təcili yardımın göstərilməsi", Təranə Seyid Məmmədova "Qeyri-epileptik tutmalar", Azad Məlikov "Epilyasiya xəstəliyinin cərrahi müalicəsi" mövzusunda məruzələrlə çıxış ediblər.