Öskürək hər hansı ağciyər xəstəliyinin simptomudur və əksər hallarda orqanizmimizin qoruyucu refleksidir. Öskürək zamanı orqanizmdən mikroblar, selik, toz və s. zərərli və yad maddələr xaric olunur. Lakin bu, yalnız nəm öskürəyə aiddir. Quru və uzunsürən xroniki öskürək orqanizmə heç bir kömək etmir və əksinə müxtəlif pozulmalara səbəb ola bilər.

 

Bu barədə Aztibb.az-a Ağsu Rayon Mərkəzi Xəstəxanasının Ailə Sağlamlıq Mərkəzinin ailə həkimi Rişad Kərimov məlumat verib. Həkim bildirib ki, öskürəyin səbəbləri müxtəlif ola bilər. Məsələn, kəskin respirator virus infeksiyaları, bronxit, bronxial astma, vərəm, allergiyalar, traxeit və laringit,  pnevmoniya (uzunsürən bəlğəmli öskürək, halsızlıq, hərarətin yüksəlməsi, iştahanın azalması, sinədə ağrılar və s.),  bəzi xroniki ürək və damar xəstəlikləri buna aiddir.

 

Rişad Kərimov qeyd edib ki, öskürəyi müalicə etməzdən əvvəl onun əsas səbəbini aşkar etmək, ilk növbədə, terapevtin müayinəsindən keçmək lazımdır. Müayinədən sonra lazım olduqda həkim xəstəni digər mütəxəssislərin müayinələrinə (LOR, ftiziatr, allerqoloq, kardioloq, qastroenteroloq) göndərə bilər:

 

"Öskürək 2 həftədən artıq davam etdikdə və hərarətin yüksəlməsi ilə müşayiət olunduqda mütləq həkimə müraciət etmək lazımdır. Çünki bu, pnevmoniyanın, vərəmin simptomu ola bilər. Bundan başqa, öskürək boğulma tutmaları ilə, təngənəfəsliklə müşayiət olunduqda, bəlğəm yaşıl və ya sarı rəngdə olduqda, eləcə də xəstənin səsi dəyişdikdə və xəstə qısa müddət ərzində səbəbsiz olaraq çəki itirdikdə həkimə müraciət etmək vacibdir".