Naxçıvan Muxtar Respublikası Səhiyyə Nazirinin birinci müavini, nazir vəzifələrini icra edən Samiq Sadıxov Naxçıvandan Türkiyənin Hacettepe Universitetinə təlimə göndərilən həkim və tibb bacısı heyəti ilə görüş keçirib.
Nazirlikdən Aztibb.az-a verilən məlumata görə, görüşdə Samiq Sadıxov qeyd edib ki, həkim və tibb bacılarının peşəkarlığının artırılması üçün cari ildən etibarən Türkiyə Universitetlərinin xəstəxanaları ilə başlanan və mərhələli şəkildə Naxçıvan səhiyyə sistemindəki bütün həkimləri və tibb bacılarını əhatə edəcək mübadilə proqramlarının növbəti mərhələsi baş tutur: "Bildiyiniz kimi, Qazi universitetində 6 həftəlik təlim keçən tibb bacılarının təlimi yanvar ayının 15-dən başlayıb. Artıq Hacettepe Universiteti ilə də ixtisaslı həkimlər və tibb bacıları üçün təlim proqramlarına başlayırıq".
Samiq Sadıxov vurğulayıb ki, tibb bacıları səhiyyə sisteminin əsas qüvvələridirlər, onların üzərlərinə düşən vəzifəni layiqincə və peşəkar yerinə yetirməyi həm tibbi xidmətin keyfiyyətinə, həm də xəstə məmnuniyyətinə ciddi təsir edən vacib amildir. İnanıram ki, hər biriniz yaradılan bu şəraitdən maksimum faydalanacaq, öz aktivliyiniz, təşəbbüskarlığınız, nizam-intizamınızla seçiləcək, bilik və bacarıqlarınızın artırılması üçün var qüvvənizlə çalışacaq, səhiyyəmizi yüksək səviyyədə təmsil edəcəksiniz.
Diqqətinizə çatdırılıb ki, mübadilə proqramlarımız ikitərəflidir. Yaxın günlərdə Türkiyənin universitetlərindən gələn professorlar və tibb bacıları Naxçıvanda müxtəlif xəstəxanalarda işə başlayacaqlar.
Görüşün sonunda tibb bacılarına “Orta tibb işçilərinin vəzifə və intizam təlimatları”na dair slayd nümayiş etdirilib.