Naxçıvan Muxtar Respublikası səhiyyə nazirinin birinci müavini, nazir vəzifələrini icra edən Samiq Sadıxov ilə Azərbaycan Standartlaşdırma İnstitutunun direktoru İlham Bayramov və institutun mütəxəssisləri arasında onlayn görüş keçirilib.
Aztibb.az-a Naxçıvan Səhiyyə Nazirliyindən verilən məlumata görə, görüşdə səhiyyə müəssisələrində xidmət keyfiyyəti, idarəetmə, resursların idarəolunması və inzibati idarəetmədə beynəlxalq standartların tətbiqinin günün əsas tələbi olduğu qeyd olunub.
Görüşdə Naxçıvan Muxtar Respublikasının səhiyyə sisteminə daxil olan tibb müəssisələrində xidmət alan xəstələrin və personalın təhlükəsizliyi, tibbi yardımın əlçatanlığı və onun təkmilləşdirilməsi, göstərilən tibbi xidmətlərin keyfiyyətinin yüksəlməsi, risklərin effektiv idarə edilməsi, keyfiyyətə nəzarətin gücləndirilməsi, xərclərin rasional istifadəsi məqsədilə İS0 9001 beynəlxalq sertifikatın alınması və tətbiqinə başlanması üzrə Standartlaşma İnstitutu ilə əməkdaşlıq imkanları müzakirə edilib. İlkin mərhələdə pilot müəssisə kimi Naxçıvan Muxtar Respublikası Səhiyyə Nazirliyinin tabeliyində olan “Təcili Tibbi Yardım Xidməti” publik hüquqi şəxsində Müştəri Məmnuniyyəti Keyfiyyəti İdarəetmə Sisteminin tətbiqinə başlanması üçün işlər görülməsinin nəzərdə tutulduğu diqqətə çatdırılıb. Sonrakı mərhələdə isə, tibb müəssisələrində digər sahələrin xidmətlərinə də keyfiyyət standartları üzrə sertifikat alınması planlaşdırılır.
