Bu gün peşəkar həkim, Mərkəzi Gömrük Hospitalının rəis müavini Nabil Seyidovun 55 yaşı tamam olur.

Aztibb.az xəbər verir ki, o, 1969-cu ildə Mingəçevir şəhərində anadan olub. 2002-ci ildə Azərbaycan Tibb Universitetini fərqlənmə ilə bitirib. Daha sonra Moskva şəhərində A.Bakulev adına Ürək-Damar Cərrahiyyəsi üzrə Elmi Mərkəzdə klinik ordinatura təhsili alıb. 2009-2010-cu illərdə ABŞ-ın Merilend ştatının Baltimor şəhərində daxili xəstəliklər üzrə internatura, 2011-2012-ci illərdə isə Vaşinqton ştatının Sietl şəhərində ümumi cərrahiyyə, travmada təcili və təxirəsalınmaz yardım, yanıqlar və kardio-vaskulyar cərrahiyyə üzrə 1 il internatura və beynəlxalq mütəxəssislər üçün xüsusi sertifikatlaşdırılmış ixtisasartırma kursu keçib.

Nabil Seyidov ABŞ-dan qayıtdıqdan sonra Azərbaycanda müxtəlif özəl tibb müəssisələrində həkim-kardioloq və terapevt kimi fəaliyyət göstərib. 2014-cü ildə Səhiyyə Nazirliyinin İctimai Səhiyyə və İslahatlar Mərkəzində həkim-metodist, şöbə müdirinin müavini və şöbə müdiri vəzifələrində çalışıb. 2018-2019-cu illərdə Səhiyyə Nazirliyinin Tibbi yardımın təşkili şöbəsinin müdiri işləyib. O, 2023-cü ildən Azərbaycan Respublikası Dövlət Gömrük Komitəsi Tibbi Xidmət İdarəsinin Mərkəzi Gömrük Hospitalının rəis müavinidir.

Peşəkar həkim olmaqla yanaşı, Nabil Seyidov tibb və qeyri-tibb işçilərinin təlim-tədrisi, səhiyyə sektorunda müasir texnologiyaların tətbiqi, teletəbabət, səhiyyənin elektronlaşdırılması, tibb xidmətlərinin keyfiyyət standartları, səhiyyə menecmenti və qeyri-infeksion xəstəliklərin profilaktikası kimi geniş spektrli məsələlərə böyük maraq göstərir.

2012-ci ildə ABŞ-da çalışdığı müddətdə o, www.uptodate.az “Uptodate In Medicine” Elmi Tibbi məlumat portalını təsis edib. Bu portal tibb və qeyri-tibb işçilərini bilik və məlumatlarla təmin etmək üçün nəzərdə tutulub. Nabil Seyidov, həmçinin Səhiyyə Nazirliyinin İctimai Səhiyyə və İslahatlar Mərkəzi tərəfindən yaradılmış “E-telim portalının” və “E-sağlamlıq” portallarının layihə rəhbəri və ideya müəllifi olub. Azərbaycan – Britaniya Məzunlar Birliyinin üzvü kimi də səmərəli fəaliyyət göstərib.

2002-ci ildən uşaq hüquqlarının müdafiəsi ilə məşğul olan həkim BMT-nin Uşaq Fondunun təşəbbüsü ilə çap olunan uşaq hüquqlarına dair dərs vəsaitinin müəllifidir. O, bu kitabı BMT-nin Uşaq Hüquqları Konvensiyası əsasında hazırlayıb.

Nabil Seyidov özündə 80-ə yaxın  təşkilatı birləşdirən Uşaq Hüquqları üzrə Azərbaycan QHT Alyansında da fəaliyyət gəstərib, 2003-cü ildə həmin alyansın milli koordinatoru, 2005-ci ildə isə 28 ölkənin QHT-lərini və UNİCEF-i birləşdirən Regional Koalisiyanın baş katibi seçilib.

Həkim bir sıra kitab və metodik vəsaitlərin həmmüəllifi, 15-dan çox elmi məqalənin müəllifidir. Bugünədək müxtəlif mövzularda 500-dən çox təlim kursları və seminarlar keçirib.

Onun müalicə etdiyi xəstəliklərə ürəyin işemik xəstəliyi, infarkt, aritmiyalar, ürək-damar əməliyyatlarından sonrakı baxım, ətraf damarların qeyri-cərrahi müalicəsi, revmatoloji xəstəliklər və ürək-damar sistemi tərəfindən ağırlaşmaların profilaktikası və müalicəsi, böyrək xəstəliklərinin ürək-damar sistemi ilə bağlı ağırlaşmalarının profilaktikası və müalicəsi, kardiorenal sindromlar, hepato-pulmonar və hepato-kardioloji sindromlar və s. daxildir. 

Aztibb.az portalı adından Nabil Seyidovu 55 illik yubileyi münasibətilə təbrik edir, ona möhkəm cansağlığı, uzun ömür və fəaliyyətində uğurlar arzulayırıq.