Birləşmiş Millətlər Təşkilatının Uşaq Fondu (UNICEF) İsrailin oktyabrın 7-dən bu yana hücumlarını davam etdirdiyi Qəzza zolağında uşaqların peyvənd olunmadıqlarını və onların xəstəliyə yoluxma təhlükəsinin artdığını açıqlayıb.

Aztibb.az-ın medimagazin.com.tr-yə  istinadla məlumatına görə, UNİCEF-dən verilən yazılı açıqlamada "Qəzzada rutin peyvəndləri qaçırma riski ilə üzləşən 16 mindən çox uşağın qızılca, pnevmoniya və poliomielit kimi xəstəliklərə yoluxa biləcəyi" xəbərdarlığı edilib.

Açıqlamada “Qəzzada uşaqlar təkcə İsrail bombalarının birbaşa təhlükəsi altında deyil, həm də blokadaya görə səhiyyə xidmətlərinin iflasa uğramaq ərəfəsində olduğu bölgədə xəstəlik təhlükəsi altındadır” ifadələri yer alıb. 

UNİCEF və tərəfdaşlarının Qəzzadakı vəziyyətə baxmayaraq dekabr ayında 962 min 550 doza vaksin tədarük etdiyi və peyvəndlərin uşaqlar üçün əlçatan olduğu bildirilib.

Digər tərəfdən, Fələstində xəstəxanaların üçdə ikisinin xidmət göstərə bilmədiyi və səhiyyə sektorunun "risk altında" olduğu qeyd edilib.