İşğal altındakı İordan çayının qərb sahilində xəstəxanaya basqın edən həkim geyimində olan İsrail qüvvələri orada müalicə alan 3 fələstinlini öldürüb.

Aztibb.az-ın medimagazin.com.tr-yə istinadla xəbərinə görə, Fələstin Səhiyyə Nazirliyindən verilən açıqlamada İsrail qüvvələrinin işğal altındakı İordan çayının qərb sahilindəki Cenin şəhərindəki İbn Sina xəstəxanasına basqın etdiyi bildirilib. Öldürülən 3 fələstinlidən ikisinin qardaş olduğu qeyd edilib.

Fələstinin Səhiyyə naziri Mey əl-Kayle Birləşmiş Millətlər Təşkilatına, beynəlxalq və insan haqları təşkilatlarına etdiyi çağırışda İsrail qüvvələrinin Qəzza zolağı və işğal altındakı İordan çayının qərb sahilində Fələstin xalqına və səhiyyə müəssisələrinə qarşı törətdiyi cinayətlərə son qoyulmasını istəyib. 

2023-cü il oktyabrın 7-dən etibarən işğal altındakı İordan çayının qərb sahili və Şərqi Qüdsdə İsrail qüvvələrinin hücumları nəticəsində həlak olan fələstinlilərin sayı 381-ə yüksəlib.