Mərkəzi Gömrük Hospitalında Dövlət Gömrük Komitəsinin Tibbi Xidmət İdarəsinin Sanitar-Karantin Xidmətinin baş müfəttişləri üçün növbəti “BLS – Təməl Həyata Dəstək” instruktur təlimi keçirilib.

Bu barədə Aztibb.az-a Hospitaldan xəbər verilib.

Təlim “Uptodate in Medicine” AHA Beynnəlxalq Təlim Mərkəzi tərəfindən aparılıb.

Mərkəzi Gömrük Hospitalının rəis müavini Nabil Seyidov və Təcili Tibbi Yardım şöbəsinin təcili yardım həkimi Cavad Cabarov tərəfindən keçirilən təlim nəzəri və praktiki mərhələdən ibarət olub. Təlimdə iştirak edən Sanitar-Karantin Xidmətinin baş müfəttişlərinə sertifikatlar təqdim olunub və onlar “BLS təlimçi”si kimi qiymətləndiriliblər.

Bununla da onlar Azərbaycan Respublikasının gömrük-sərhəd buraxılış məntəqələrində gömrük əməkdaşları üçün “BLS – Təməl Həyata Dəstək” təlimini keçmək hüququnu qazanıblar.

Xatırladaq ki, bu təlimlərin əsas məqsədi hadisə yerində peşəkar həkim briqadası gələnə qədər xəstə və ya yaralılara ilk yardımın göstərilməsi bacarıqlarının öyrədilməsidir.