Səhiyyə Nazirliyi K.Y.Fərəcova adına Elmi-Tədqiqat Pediatriya İnstitutunda (ETPİ) Elmi Şuranın 2024-cü il üçün ilk iclası keçirilib.

 

İnstitutdan Aztibb.az-a verilən məlumata görə, müəssisənin direktoru, Elmi Şuranın sədri t.ü.f.d., dos Aynur Poluxova iclasın gündəliyinə Elmi-Tədqiqat Pediatriya İnstitutunun klinik şöbələrinin (vaxtından əvvəl doğulan uşaqların patologiyası şöbəsi, yenidoğulmuşların patologiya şöbəsi) 2023-cü il üçün illik hesabatlarının və müxtəlif məsələlərin daxil olduğunu bildirib.

 

İclasda klinik şöbələrin rəhbərləri 2023-cü il üçün illik hesabatları təqdim ediblər.

 

Hesabatlar müzakirə olunub, şöbələrin fəaliyyəti qənaətbəxş hesab edilib və açıq səsvermə ilə təsdiqlənib.

 

Daha sonra tibb üzrə fəlsəfə doktoru elmi dərəcəsini almaq üçün doktorant Şəbnəm Qəhrəmanlı Azərbaycan Respublikası Elmi Tədqiqatların Əlaqələndirilməsi Şurasının tələblərinə uyğun olaraq tərtib edilmiş “Bətndaxili inkişafın ləngiməsi ilə doğulan uşaqlarda neyroinkişaf geriliyin proqnozlaşdırılması” mövzusunda dissertasiya işini təqdim edib. Mövzu ətrafında müzakirələr aparılıb. Təqdim edilən iş qənaətbəxş hesab edilib.

 

İnstitutun elmi katibi, t.ü.f.d., dos. Sevinc Nəsirova planlaşdırılan elmi konqres və konfranslardə dərc olunacaq tezis materiallarına olan tələbləri diqqətə çatdırıb.

 

Sonda direktor qısa müddət ərzində bu şöbələrin fəaliyyətində olan yeniliklər (istər təchizat, təminat, istərsə də xəstəlik tarixlərində olan dəyişikliklər və.s) barədə məlumat verib.