3 gün əvvəl həyata keçirdiyimiz böyrək köçürülməsi ilə daha bir xəstəmiz sağlamlığına qovuşdu.

 

Aztibb.az xəbər verir ki, bu barədə Mərkəzi Klinikanın ümumi cərrahı, transplantoloq Tariyel Nadirov sosial şəbəkədə məlumat paylaşıb.

 

Tariyel Nadirov qeyd edib ki, ciddi ürək problemləri olan xəstənin ( EF 25%, MÇ 3, AÇ 2, TÇ 2, artmış pulmonar təzyiq, perikardda maye) əməliyyat zamanı və əməliyyatdan sonra problem yaşama riski çox yüksək idi. Dializdə ciddi problemlər yaşayan pasiyentin yeganə yolu böyrək köçürülməsi idi.

 

"Biz və xəstə yaxınları bütün riskləri bərabər qəbul edərək xəstə və donoru əməliyyata aldıq. Əməliyyat öncəsi ciddi anesteziya hazırlığından sonra anasından laparaskopik üsulla aldığımız böyrəyi pasiyentə köçürdük. Xəstənin əməliyyat stolunda sidik çıxışı başladı.

 

Əməliyyatdan sonra xəstə Reanimasiya şöbəsinə, donor isə palataya köçürüldü. Əməliyyatın səhəri günü xəstə palataya köçürüldü", - deyə transplantoloq əlavə edib.

 

O, donoru artıq evə göndərdiklərini, 2 gün sonra isə xəstəni evə göndərməyi planlaşdırdıqlarını bildirib.