Qəzza zolağından didərgin düşmüş xroniki xəstəlikləri olan fələstinlilər İsrailin 105 gündür davam edən hücumları nəticəsində lazımi miqdarda tibbi ləvazimatların ölkəyə girişinin qadağan edilməsi və dərman qıtlığı səbəbindən aylardır müalicələrini davam etdirə bilmirlər.

Aztibb.az-ın medimagazin.com.tr-yə istinadla məlumatına görə, təxminən 10 il əvvəl depressiya diaqnozu qoyulan Rıda Avad dərman çatışmazlığı səbəbindən 2 aydır dərman ala bilmir.

İsrailin hücumları nəticəsində iki dəfə yerindən-yurdundan didərgin düşən və Qəzzanın cənubundakı Rəfah şəhərinə gələn Avad, xroniki xəstəliyi və ağırlaşmalarına baxmayaraq müalicəsini davam etdirə bilmir.

Yeddi uşağı olan və 28 məcburi köçkün fələstinlinin yaşadığı çadırda yaşayan Avad xroniki xəstəlikləri olan və aylardır dərmanlarını ala bilməyən yüz minlərlə fələstinlidən biridir.

Həmçinin Qəzzada məcburi köçkün olan 67 yaşlı Faiz Abduh təxminən 4 ay əvvəl İsrailin hücumları səbəbindən şəkər və təzyiq dərmanlarını dayandırmalı olub.

Qəzzada Səhiyyə Nazirliyi xroniki xəstəliyi olan 350 min insanın İsrailin davam edən hücumları səbəbiylə dərman ala bilmədiklərini açıqlayıb.

Nazirlik bu şəxslərin dərman qəbul edə bilməmələri səbəbindən səhhətlərində ciddi fəsadların olması barədə xəbərdarlıq etmiş və beynəlxalq təşkilatları “xroniki xəstələri təcili müalicə etməyə” çağırmışdı.