Bu gün tanınmış otolarinqoloq, Səhiyyə Nazirliyinin mütəxəssis-eksperti, ATU-nun Tədris Cərrahiyyə Klinikasının Qulaq-burun-boğaz cərrahiyyəsi şöbəsinin müdiri, tibb üzrə fəlsəfə doktoru Rəşad Talışınskinin 60 yaşı tamam olur.
Aztibb.az xəbər verir ki, Rəşad Talışınski 1964-cü ildə Bakı şəhərində anadan olub. 1981-1987-ci illərdə Azərbaycan Tibb Universitetinin Müalicə işi fakültəsində təhsil alıb. 1987-1988-ci illərdə Bakı şəhəri 4 saylı klinik xəstəxananın Cərrahiyyə şöbəsində internatura keçib.
O, 1989-1990-cı illərdə Lənkəran Hərbi Hospitalın Cərrahi şöbəsində həkim-otorinolorinqoloq kimi fəaliyyət göstərib. 1990-1991-ci illərdə Respublika Daxili İşlər Nazirliyinin Hospitalının Cərrahiyyə şöbəsində həkim-otorinolorinqoloq vəzifəsində çalışıb. 1991-ci ildə ATU-nun Otorinolorinqologiya üzrə əyani aspiranturasına daxil olub, 1994-cü ildə oranı bitirib. Hazırda ATU-nun Tədris Cərrahiyyə Klinikasının Qulaq-burun-boğaz cərrahiyyəsi şöbəsinin müdiridir.
Rəşad Talışınski 2001-ci ildə "Uşaqlarda burun arakəsməsinin deformasiyası zamanı korreksiyaedici əməliyyatın tətbiqi" mövzusunda dissertasiya işini müdafiə edərək tibb üzrə fəlsəfə doktoru elmi dərəcəsini alıb.
Həkim 50-yə yaxın elmi əsərin, Rusiya Federasiyasının 3 patentinin, o cümlədən həkimlər üçün 1 vəsaitin müəllifidir.
O, Azərbaycan LOR Cəmiyyətinin və Azərbaycan Respirator Cəmiyyətinin üzvüdür.
Aztibb.az portalı adından tibb üzrə fəlsəfə doktoru Rəşad Talışınskini 60 illik yubileyi münasibətilə təbrik edir, ona möhkəm cansağlığı, uzun ömür və fəaliyyətində uğurlar arzulayırıq.