Gəncə Şəhər Birləşmiş Xəstəxanasının nəzdində fəaliyyət göstərən tibb müəssisələrində 20 Yanvar faciəsinin 34-cü ildönümü ilə əlaqadar tədbirlər keçirilib.

Xəstəxanadan Aztibb.az-a verilən xəbərə görə, ilk olaraq 20 Yanvar faciəsi qurbanlarının əziz xatirəsi bir dəqiqəlik sükutla yad edilib. Daha sonra müəsisələrin baş həkimləri qanlı yanvar haqqında çıxışlar ediblər.

Bu epoxal hadisə Azərbaycan milli kimliyinin formalaşmasına həlledici təsir göstərib, dövlət müstəqilliyinin bərpa edilməsində dönüş nöqtəsi olub. Məhz bu faciədən sonra milli azadlıq hərəkatı tam siyasi reallığa çevrilib, dönməz xarakter alıb, xalq öz gələcəyini yalnız müstəqil Azərbaycanda görüb.

Azərbaycan xalqı 20 Yanvar şəhidlərinin xatirəsini əziz tutur. Hər il faciənin ildönümü izdihamlı ziyarətlərlə müşayiət edilir, xalq istiqlal fədailərinin məzarlarına faciənin simvoluna çevrilmiş al qərənfillər düzür, onları qürurla anır, qatillərini lənətləyir, bu faciəni törədənlərə dərin nifrətini bildirir.