Tədbirdə müəssisənin direktoru, tibb elmləri doktoru, professor Cəmilə Qurbanova 20 Yanvar faciəsinin mahiyyətindən söz açaraq, qan yaddaşımız ilə bağlı  həqiqətlərin indiki və gələcək nəsillərə çatdırılmasının önəmini vurğulayıb.

 

İnstitutun YAP təşkilatının sədri Ədalət Əliyev 1990-cı il yanvar ayının 19-dan 20-nə keçən gecə birbaşa Sovet İttifaqı Kommunist Partiyası Mərkəzi Komitəsinin baş katibi Mixail Qorbaçovun əmri ilə Bakıda və Azərbaycanın bir neçə rayonunda dinc əhalinin ağır texnikadan və müxtəlif tipli silahlardan atəşə tutularaq kütləvi şəkildə qətlə yetirildiyi hadisələr haqqında tədbir iştirakçılarına məlumat verib. O, Ümummilli Lider Heydər Əliyev və onun irsini uğurla davam etdirən Ali Baş Komandan İlham Əliyevin apardığı uğurlu xarici siyasət nəticəsində xalqımıza qarşı törədilən hadisələrin beynəlxalq arenada lazımi səviyyədə işıqlandırıldığını qeyd edib.

 

Digər natiqlər də 20 Yanvar hadisələrinin xalqımız üçün Zəfərə aparan yol olduğunu vurğulayaraq çıxışlarında xalqımızın şəhidlərin şücaətini daim yüksək qiymətləndirdiyini, onların ruhuna ehtiram göstərdiyini və xatirəsini hər zaman uca tutduğunu qeyd ediblər.