Samux Rayon Mərkəzi Xəstəxanasında "20 Yanvar faciəsi tariximizin şərəf və qəhrəmanlıq səhifəsidir" adlı tədbir keçirilib.

Aztibb.az-a Xəstəxanadan verilən xəbərə görə, əvvəlcə Vətənimizin azadlığı uğrunda canlarından keçmiş şəhidlərin əziz xatirəsi bir dəqiqəlik sükutla yad edilib.

Tədbirdə çıxış edən Samux Rayon Mərkəzi Xəstəxanasının direktoru Loğman Hacı Bədəlli müstəqil dövlətçilik tariximizin acılı, lakin şərəfli günlərinin yaşandığını diqqətə çatdırıb. O, Azərbaycan tarixində önəmli mərhələ təşkil edən bu cür qanla yazılan tarixlərin qeyd olunmasının və yaşadılmasının əhəmiyyətini vurğulayıb.

Direktor bu hadisələrə ilk dəfə hüquqi-siyasi qiymətin xalqımızın Ümummilli Lideri Heydər Əliyev tərəfindən verildiyini diqqətə çatdırıb.  Qeyd edib ki, Ümummilli Liderin siyasi kursunun layiqli davamçısı Prezident İlham Əliyev də 20 Yanvar faciəsinin qurbanlarının xatirəsini daim uca tutur. 20 Yanvar şəhidlərinin xatirəsi hər birimizin qəlbində əbədi yaşayır.