"Həkimlərimizi tanıyaq!" rubrikasında söz açacağımız onkoloq Vüsal İzzət oğlu Səfərov İsmayıllı rayonunun sevilən-seçilən təbiblərindən biridir. O, bu günədək mənalı həyatını bütünlüklə şərəfli işinə, müqəddəs peşəsinə, insanların sağlamlığına həsr edib.

 

Vüsal Səfərov 11 may 1977-ci ildə İsmayıllı rayonu Topçu kəndində anadan olub. 1994-cü ildə Azərbaycan Tibb Universitetinin Müalicə-profilaktika fakültəsinə daxil olub. 2000-2001-ci illərdə A.T.Abbasov adına Bakı Şəhər Onkoloji Dispanserində onkoloq ixtisası üzrə həkim-internatura keçib.

 

O, 2001-2003-cü illərdə Müdafiə Nazirliyinin N saylı hərbi hissəsinin Tibbi məntəqə rəisi vəzifəsində çalışıb. 2003-2008-ci illər Rusiya Federasiyası, Rostov və Moskva şəhərlərində “Plaza” özəl Tibb Mərkəzinin baş həkimi işləyib.

2009-2017-ci illərdə Abşeron və Göyçay rayonlarında Məhkəmə-tibbi ekspert vəzifəsinə təyin olunub.

 

Həkim 2017-2023-cü illərdə  Məhkəmə Tibbi Ekspertiza və Patoloji Anatomiya birliyi PHŞ-nın Şəki rayon şöbəsinin rəisi vəzifəsində çalışıb. 2024-ci ildən İsmayıllı Rayon Mərkəzi Xəstəxanasının Poliklinika şöbəsində həkim-onkoloq kimi fəaliyyətini davam etdirir.