Xəstəxanadan Aztibb.az-a verilən məlumata görə, tədbirdə TƏBİB-in Tibbi xidmətlərin təşkili, Strateji inkişaf, Tibbi təhsil və innovasiyalar departamentlərinin əməkdaşları,  Gəncə Şəhər Birləşmiş Xəstəxanası daxil ətraf rayonların (Samux, Naftalan, Daşkəsən, Göygöl, Goranboy) müvafiq tibb müəssisələrinin rəhbərləri, ilkin səhiyyə xidməti üzrə məsul şəxs, poliklinika şöbələrinin müdirləri, ailə sağlamlıq mərkəzləri və kənd həkim məntəqələrinin müdirləri iştirak ediblər.

 

Tədbirdə Azyaşlı uşaqlar, hamilə və zahı qadınların patronaj xidmətinin təşkili və nəzarətin təmin edilməsi üzrə kuratorlar və təlimçilər çıxış ediblər.

 

Açılış nitqi ilə çıxış edən Tibbi xidmətlərin təşkili departamentinin İlkin səhiyyə xidmətləri şöbəsinin müdiri Nəhmət Rəhmanov səhiyyə sistemində ilkin səhiyyə xidmətinin yeri, ilkin səhiyyə xidmətinin gücləndirilməsi perspektivləri, azyaşlı uşaqlar, hamilə və zahı qadınlara göstərilən patronaj xidmətlərinin universal proqressiv modelinin tətbiqinin gücləndirilməsi barədə danışıb.

 

Tibbi xidmətlərin təşkili departamentinin İlkin səhiyyə xidmətləri şöbəsinin aparıcı məsləhətçisi Aygün Xəlilova çıxışında bildirib ki, profilaktik peyvəndlər vasitəsilə yoluxucu xəstəliklərin qarşısının alınması yoluxucu infeksion xəstəliklərə qarşı ən effektiv müdafiə metodu hesab edilir və əhalinin sağlamlığının qorunması məqsədilə həyata keçirilir.

 

Sonda Tibbi təhsil və inovasiyalar departamentinin Davamlı tibbi təhsil şöbəsinin müdiri Emil İskəndərov isə təlimlərin təşkili və keçirilməsi ilə bağlı çıxış edib. Bu cür tədbirlərin davamlı keçirilməsinin nəzərdə tutulduğunu bildirib.