O, 20 mart 1956-cı ildə Bakı şəhərində anadan olub. 1974-1980-ci illərdə Azərbaycan Tibb İnstitutunda təhsil alıb. 1981-ci ildə təyinatla 5 nömrəli Şəhər Poliklinikasında həkim vəzifəsində işə başlayıb.

 

Ziyafət Tağıyeva 1982-ci ildən 1 saylı Semaşko xəstəxanasında həkim-infeksionist, 1984-cü ildən xəstəxananın Yoluxucu şöbəsinin müdiri, 1992-2000-ci illərdə Baş həkimin Yoluxucu xəstəliklər üzrə müavini vəzifələrində çalışıb. 2014-cü ildən 2020-ci ilin yanvar ayınadək Azərbaycan Respublikası Səhiyyə Nazirliyinin “Hepatit virusuna yoluxmuş şəxslərin müayinə və müalicəsinin təşkili” barədə əmri ilə təsdiq edilmiş “B və C” viruslu hepatitlərin profilaktikası, diaqnostika və müalicəsinin təşkili üzrə komissiya tərəfindən hepatit virusuna yoluxmuş xəstələrə təyin olunmuş dərman preparatlarının paylanması üzrə məsul şəxs kimi fəaliyyət göstərib.

Həkim 2020-2021-ci illərdə Azərbaycan Respublikasında yayılmış COVID-19 pandemiyası ilə əlaqədar modul tipli TƏBİB-in yaratdığı Operativ Qərargaha ezam edilib.

 

2012-2015-ci illərdə Azərbaycan Respublikası Səhiyyə Nazirliyi Sertifikasiya Komissiyasında Attestasiya Komissiyasının üzvü olub.

 

Hazırda İ.M.Seçenov adına Birinci Moskva Dövlət Tibb Universitetinin İnfeksion xəstəliklər kafedrasının müəllimidir.

 

O, 2021-ci ilin iyun ayından Bakı Baş Səhiyyə Mərkəzinin strukturuna daxil olan 37 nömrəli Şəhər Poliklinikasının baş həkimi vəzifəsində çalışır.

 

Ziyafət Tağıyeva 2020-ci ildə Azərbaycan Respublikası Prezidentinin Sərəncamı ilə “Əməkdar həkim” fəxri adına layiq görülüb.